Шымкентте аға буын өкілдерінің денсаулығын нығайтып, белсенді өмір салтын қалыптастыруға бағытталған жұмыстар жүйелі түрде жалғасып келеді. Осы бағыттағы маңызды әлеуметтік жобалардың бірі – зейнеткерлердің денсаулығын сақтауға және олардың қоғамдық өмірге белсенді араласуына мүмкіндік беретін «Белсенді ұзақ өмір орталығы».
Шымкент қаласы Жұмыспен қамту және әлеуметтік қорғау басқармасына қарасты «Белсенді ұзақ өмір орталығы» КММ-нің бүгінде төрт бөлімшесі жұмыс істейді. Мұнда күн сайын 800-ге жуық зейнеткер түрлі қызмет түрлерімен қамтылады. Орталықтың басты ерекшелігі – мұнда зейнеткерлердің уақытын тиімді өткізуімен қатар, олардың денсаулығын нығайтуға бағытталған кешенді жұмыстар жүргізіледі.
Орталықта қызмет алушылар үшін спорттық жаттығулар, би, музыка, еңбек терапиясы, йога және тіл үйрену сабақтары ұйымдастырылған. Сонымен қатар зейнеткерлерге фито шайлар ұсынылады. Мұндай қызмет түрлері аға буын өкілдерінің дене белсенділігін арттырып қана қоймай, олардың әлеуметтік ортаға араласуына, жаңа дағдыларды меңгеруіне және бос уақытын пайдалы өткізуіне жағдай жасайды.
Орталыққа келген әрбір зейнеткер ең алдымен дәрігерлік тексеруден өтеді. Мамандар олардың қан қысымы мен дене қызуын өлшеп, жалпы денсаулық жағдайын бақылауда ұстайды. Медициналық бақылаудан кейін қызмет алушы өзінің денсаулық жағдайы мен қажеттілігіне қарай тиісті бағыттағы сабақтар мен қызмет түрлеріне қатысады.
Жүйелі түрде жүргізілген бақылау нәтижесінде бірқатар созылмалы аурулар бойынша оң динамика байқалған. Мәселен, созылмалы бронхит бойынша қызмет алушылардың 57,8 пайызында денсаулық жағдайының жақсаруы тіркелген. Артериялық гипертониясы бар зейнеткерлердің 35 пайызының денсаулық жағдайында оң өзгеріс байқалса, артрит бойынша бұл көрсеткіш 35,7 пайызды құраған.
Ең елеулі көрсеткіштердің бірі – артық салмақ мәселесі бойынша байқалған оң динамика. Бүгінде бұл көрсеткіш 51 пайызға жеткен. Ал 2025 жылы ол 31 пайыз болған. Яғни бір жыл ішінде оң динамика көрсеткіші 20 пайыздық пунктке артқан.
Бұл нәтиже орталықта жүзеге асырылып жатқан дене шынықтыру, йога, бассейн және дұрыс тамақтану бағытындағы кешенді жұмыстардың тиімділігін көрсетеді. Белсенді қозғалыс пен салауатты өмір салтын ұстану егде жастағы азаматтардың денсаулығын сақтауға ғана емес, күнделікті өмірдегі белсенділігін арттыруға да ықпал етеді.
Мұндай орталықтардың жұмысы аға буын өкілдерінің қоғамдағы рөлін сақтауға да мүмкіндік береді. Себебі зейнеткерлік кезең адамның қоғамдық өмірден шет қалатын уақыты емес. Керісінше, денсаулығын күтіп, жаңа іспен айналысып, өз ортасымен араласуға мүмкіндік алған азаматтар белсенді өмір салтын жалғастыра алады.
Бүгінде «Белсенді ұзақ өмір орталығы» зейнеткерлердің бос уақытын тиімді ұйымдастыратын орыннан әлдеқайда ауқымды әлеуметтік қолдау алаңына айналып отыр. Мұнда денсаулықты нығайту, қозғалыс белсенділігін арттыру, жаңа білім мен дағдыларды меңгеру, адамдармен араласу секілді бағыттар бір арнаға тоғысқан.
Аға буынның денсаулығы мен белсенділігі – қоғамның әлеуметтік әл-ауқатының маңызды көрсеткіштерінің бірі. Сондықтан мұндай жобалардың дамуы зейнеткерлердің өмір сапасын арттырып қана қоймай, белсенді әрі салауатты қоғам қалыптастыруға да өз үлесін қосады.