Қалада «Заң мен тәртіп» қағидатын, жайлы әрі экологиялық тұрғыдан қауіпсіз ортаны қалыптастыру бағытында жұмыстар одан әрі жалғасуда. Жуырда мегаполисте экологиялық ахуалды жақсартуға, атмосфералық ауаның сапасын арттыруға және қала көшелерінің тазалығын қамтамасыз етуге бағытталған ауқымды рейд өтті. Іс-шараға жергілікті атқарушы органдардың өкілдері, экологиялық қызмет мамандары және полиция департаментінің қызметкерлері қатысты.
Ведомствоаралық бірлескен жұмыс еліміздің үшінші мегаполисінде экологиялық ахуалға кері әсер ететін заңбұзушылықтарды анықтауға бағытталды. Рейд барысында ауаның ластануының негізгі көздерінің бірі саналатын автокөліктерді тексеруге ерекше назар аударылды. Экологиялық қызмет мамандары «Арғымақ» автокөлік базарында арнайы газ талдағыш құралдардың көмегімен көліктердің шығарындыларындағы зиянды заттардың деңгейін өлшеді. Экологиялық нормалардан асып кеткен көлік құралдары ерекше бақылауға алынып, олардың иелеріне тиісті нұсқамалар берілді.
Сонымен қатар, мобильді топтар құрылыс алаңдары мен өнеркәсіптік аймақтарды тексерді. Негізгі мақсат – құрылыс қалдықтарын рұқсатсыз төгу фактілерінің жолын кесу. Қала әкімдігінің мәліметінше, мұндай рейдтер бір реттік акция емес, тұрғындардың өмір сүру сапасын арттыруға бағытталған жүйелі жұмыстың бір бөлігі. Шымкентте «жасыл» экономика қағидаттарын енгізуге басымдық беріліп, экологиялық заңнама талаптарының сақталуын бақылау осы стратегияның маңызды тетігі болып отыр.
Іс-шара барысында атмосфералық ауаны ластау және абаттандыру талаптарын сақтамауға қатысты бірнеше ондаған заңбұзушылық анықталды. Кінәлі тұлғаларға қатысты әкімшілік хаттамалар толтырылды. Бақылау жұмыстарымен қатар, ведомство өкілдері кәсіпкерлер мен көлік жүргізушілеріне түсіндіру жұмыстарын жүргізіп, экологиялық талаптарды сақтаудың маңыздылығын еске салды.
Қала әкімдігі Шымкенттегі экологиялық мониторинг жұмыстары күшейтілетінін хабарлады. Алдағы уақытта экологиялық бақылау бекеттерінің желісін кеңейту және ауа сапасын нақты уақыт режимінде бақылауға мүмкіндік беретін жаңа цифрлық шешімдерді енгізу жоспарланып отыр.
Қала тұрғындарын экологиялық құқықбұзушылықтарға бейжай қарамай, қоршаған ортаға зиян келтіретін фактілер туралы тиісті органдарға хабарлауға шақырады. Өйткені, туған қаланың тазалығына әр азаматтың қосқан үлесі маңызды.
