Түлкібас ауданындағы жұмысын былтыр ғана бастаған «Нұрсәуле фрудс» ЖШС балық шаруашылығымен айналысады. Серіктестік жылына 100 тонна сазан, ақ амур, дөңмандай, фарель балықтарын сатылымға шығарады. Қазір серіктестік Құлан су қоймасы мен жасанды бассейндерге 3 млн. 200 мың дана шабақ жіберген. Мұнда 14 адам жұмыспен қамтылды.
Жуырда аудан әкімі Нұржан Ізтілеуов жауапты мамандармен бірге серіктестік жұмысымен арнайы танысты.
Жалпы, аудан көлемінде балық өсірумен айналысқысы келетіндер қатары артып келеді. Осыдан 10 жыл бұрын Арыс ауылдық округіне қарасты «First Fish Company» ЖШС ғана жұмыс істеп келсе, бүгінде ауданда 12 шаруашылық өзен, көлдер мен жасанды тоғандарға балық шабақтарын жіберіп, кәсіптерін дөңгелетіп отыр. Осы күнге дейін тоғандарға 3,5 млн. дана шабақ жіберіліпті.
