Түркістан облыстық білім басқармасына қарасты аудандық білім бөлімдерінде апта ішінде бірқатар ісшаралар ұйымдастырылды. Атап айтқанда:
САЙРАМ: ӘДІСТЕМЕЛІК КӨМЕК КӨРСЕТІЛДІ
Сайрам ауданы білім бөлімінің жылдық жоспарына сәйкес, 2023-2024 оқу жылында білім беру мекемелерінде балалар мен жасөспірімдер арасындағы аутодеструктивті, девиантты мінез-құлықты, құқықбұзушылықты, ерте жүктілікті, зорлық-зомбылықты болдырмау, оның алдын алу мақсатында бірнеше іс-шаралар жоспарланған.
Атап айтсақ, психологиялық қызмет бойынша бекітілген мобильдік топ мүшелері ағымдағы жылдың 24-26 қазан күндері білім беру мекемелерінде балалар мен жасөспірімдер арасында орын алған түрлі жағдайлардың себеп-салдарын анықтау, оқушылардың беймазалық жай-күйін төмендету бойынша аудан мектептеріне көмекке барды. Мобильдік топ мүшелері күйзеліске бейім және қобалжу деңгейі жоғары «Тәуекел тобына» жататын балаларға педагогикалық-психологиялық көмек беру, мектеп педагог-психологтарының «Бестерек» жобасы аясында жұмыстарын күшейту бағытында әдістемелік көмек көрсету жұмыстарын жүргізді.
Балалар мен жасөспірімдер арасында зорлық-зомбылық фактілерін анықтау мақсатында сауалнама алынды және оның нәтижесі талқыланып, педагог-психологтарға алдағы уақытта атқаратын жұмыс алгоритмі туралы кеңестер берілді.
ТҮЛКІБАС: «ҮЗДІК АВТОРЛЫҚ БАҒДАРЛАМА» БАЙҚАУЫНДА ЖҮЛДЕЛІ II — III ОРЫНДАРДЫ ИЕЛЕНДІ
Түркістан қаласы, Б.Момышұлы атындағы жалпы білім беретін мектеп базасында филология бағыты бойынша (қазақ тілі, орыс тілі, өзбек тілі мен әдебиеті, ағылшын тілі) білім беру мекемелерінің мұғалімдері арасында облыстық «Үздік авторлық бағдарлама» байқауы өтті.
Байқау мақсаты: пәндер бойынша таңдау курстарын, арнайы курстар, элективті курстар, оқу пәндерінің авторлық бағдарламаларын құрастыратын Үздік мұғалімдердің алдыңғы қатарлы авторлық тәжірибесін анықтау және тарату.
Жұмыс презентация түрінде қорғалды, оған 7 минут уақыт берілді. Онда авторлық бағдарламаның элементтері, бағдарламаның түсіндірме жазбасы, мазмұны, авторлық бағдарламаның әдістемелік қамтамасыз етілуі қаралды.
Байқауға Түлкібас ауданы білім бөліміне қарасты «Майлыкент» ЖББМ қазақ тілі мен әдебиеті пәнінің мұғалімі А.Изтлеуова және өзбек тілі мен әдебиеті пәнінен Ә.Науаи ат. ЖББМ Н.Каримова қатысты.
Жеңімпаздарды анықтаудың жалпы өлшем шарттары бойынша тақырыптың өзектілігі, ұсынылған материалдардың жаңашылдығы және ерекшелігі, жұмыстың оқу-тәрбие үдерісінде қолдануға бағытталуы бойынша бағаланды.
Байқау қорытындысы бойынша қазақ тілі мен әдебиеті пәнінің мұғалімі Алия Изтлеуова жүлделі III орынды және өзбек тілі мен әдебиеті пәнінен Наима Каримова жүлделі II орынды иеленді.
«ҚАТЫГЕЗДІК ПЕН ЗОРЛЫҚ-ЗОМБЫЛЫҚСЫЗ БАЛАЛЫҚ ШАҚ» АТТЫ АҚПАРАТТЫҚ НАУҚАНЫ БАСТАУ АЛДЫ
Бүгін Бәйдібек аудандық білім беру ұйымдары арасында «Қатыгездік пен зорлық-зомбылықсыз балалық шақ» ақпараттық науқаны бастау алды.
Мақсаты — балаларға қатыгездік пен немқұрайлылық мәселесіне қоғамдық назар аудару, қоғамда балаларды қатыгездікке төзбеушілік көзқарасын қалыптастыру.
Науқанның мақсатты тобы – ата-аналар, балалар мен жастар, мемлекеттік құрылымдардың, құқық қорғау органдарының, Балалардың құқықтарын қорғау саласында жұмыс істейтін ҮЕҰ, сондай-ақ БАҚ өкілдері болып табылады.
Аталған науқанның 2023 жылдың 8-20 қараша күндері аралығында өтетінін ескерсек, алдағы уақытта жоспарға сәйкес барлық білім беру мекемелерінде сынып сағаттары, ата-аналар жиналысы, БАҚ және ҮЕҰ мемлекеттік ұйымдарының басшыларымен кездесулер, конференциялар, дөңгелек үстелдер жүйелі түрде ұйымдастырылатын болады.
БІЛІМ ОРДАСЫНДА ӨЗБЕКӘЛІ ЖӘНІБЕКОВКЕ ЕСКЕРТКІШ-БЮСТ ОРНАТЫЛДЫ
Келес ауданының орталығында орналасқан №2 Өзбекәлі Жәнібеков атындағы мектеп-гимназиясында қоғам қайраткері Өзбекәлі Жәнібековке демеушілер қолдауымен ескерткіш бюст орнатылды. Тас тұғырдың салтанатты ашылу рәсімінде алғаш болып сөз алған аудандық мәслихат төрағасы Нұржан Бурлибаевич ұлт рухын ұлықтаған ұлы тұлғаның ұлттық мәдениетіміздің қайта жаңғыруына қосқан еселі еңбегін тілге тиек етті. Жиылған жұртшылық іс-шара барысында қазақ мәдениетінде өшпессіз із қалдырған, ұлттық жәдігерлерді өскелең ұрпаққа аманаттаған арда азаматтың өмір жолымен танысты.
Салтанатты шарада сөз алған ұлт жанашырының ұрпақтары да Өзбекәлі Жәнібеков халық алғысын арқалаған таутұлға екенін атап өтті. Айтулы шараға аудандық мәслихат төрағасы Нұржан Шаулиевпен бірге аудандық мәслихат депутаты Амангелді Жүзенов, Келес ауданы білім бөлімінің басшысы Бахтияр Абдиев, Ө.Жәнібековтың ұрпақтары мен ұстаздар, мектеп ұжымы қатысты.
Білім ордасында ашылған ерекше ескерткіш-бюст мүсінші Есжанов Мергеннің туындысы.
Айта кету керек қазіргі таңда Өзбекәлі Жәнібеков есімін иеленген білім ордасында 2000-нан аса оқушы тәлім алады.
«ЖАС ҰРПАҚ ТӘРБИЕСІНДЕГІ БЕТБҰРЫС» АТТЫ ОБЛЫСТЫҚ СЕМИНАР-КЕҢЕС ӨТТІ
Бүгін Созақ ауданы, Ы.Алтынсарин атындағы жалпы білім беретін мектебінде «Жас ұрпақ тәрбиесіндегі бетбұрыс» тақырыбында облыстық семинар-кеңес өтті.
Аталған іс-шараға Созақ ауданы әкімінің орынбасары Қалдыбек Оразов, облыстық ардагерлер кеңесі төрағасының орынбасары Бақытжан Романқұлов, аудандық ардагерлер кеңесінің төрағасы Қабылбек Еспенбетов және Созақ ауданының білім бөлімінің басшысы Нұралы Айдаров, мектеп директорының тәрбие ісі жөніндегі орынбасарлары, «Әкелер мектебінің» төрағалары мен «Әжелер алқасының» төрайымдары қатысты.
Отбасылық құндылықтарды сақтау, әкелердің бала тәрбиелеудегі жауапкершілігін арттыру, тәрбие үдерісін ұйымдастыру, әкенің отбасындағы рөлін терең тану және жетілдіру мақсатында өткен шарада Созақ ауданы әкімінің орынбасары Қалдыбек Оразов «Әкелер мектебінің» маңыздылығы, бала тәрбиелеудегі өзекті мәселелер туралы сөз қозғаса, облыстық ардагерлер кеңесі төрағасының орынбасары Бақытжан Романқұлов «Әкелер мектебінің ұрпақ тәрбиесіндегі рөлі» тақырыбында баяндама жасады.
Созақ ауданының білім бөлімінің басшысы Нұралы Айдаров «Құндылықтарға негізделген білім беру» бағдарламасы аясында құрылған «Әкелер мектебінің» маңыздылығын таныту арқылы бала тәрбиесіндегі әкелердің жауапкершілігін арттыру, әке рөлін көтеруге бағытталған пікірталас алаңын құру туралы тілге тиек етті.
Семинар барысында «Әке – бәйтерегім, ұлым – мұрагерім» тақырыбында семинар-сабақ, «Бір әкенің тәрбиесін жүз мектеп бере алмайды» тақырыбында пікірталас, «Әкешім – бәйтерегім» тақырыбында ашық тәрбие сағаттары көрсетілді.
Шара соңында семинар-кеңеске қатысушыларға концерттік бағдарлама ұсынылып, психологиялық тренингтер ұйымдастырылды.
КЕЛЕС: МЕКТЕП КІТАПХАНАСЫНДА ХХ ҒАСЫРДЫҢ 50 ЖЫЛДАРЫ БАСЫЛҒАН КӨНЕ КІТАП САҚТАУЛЫ ТҰР
Келес ауданы, №25 С.Сейфуллин атындағы жалпы орта білім беретін мектеп кітапханасында 1957 жылы Алматы қаласындағы Қазақтың Мемлекеттік Көркем әдебиет баспасынан басып шығарылған Абай Құнанбайұлының екі томдық шығармалар жинағы сақталған. Бұл мектеп кітапханасындағы көне әрі құнды кітаптардың бірі болып табылады. Кітапханашы Гүлмира Турысбекованың айтуынша, мұндай кітаптарға оқырмандар тарапынан сұраныс көп екенін айтады:
— Мектеп кітапханасында жалпы 15351 кітап бар, оқулық саны — 14456, әдістемелік кітаптар — 177, анықтамалық кітаптар — 56, сөздіктер — 29, электронды оқулықтар — 239, әдеби кітаптар — 394 дананы құрайды.
Соның ішінде ең көне кітап 1957 жылғы Абай Құнанбаевтың шығармалар жинағының 1-томы қолданысқа ие болып тұр. Кітап мектеп кітапханасында 66 жылдан бері сақтаулы. Мұндай құнды жәдігерлерді біз көздің қарашығындай сақтауымыз қажет,-дейді Гүлмира Турысбекова.
Айта кету керек, мектеп кітапханасында оқушылардың кітап оқуына барлық жағдай жасалған. Сондай-ақ, балаларды кітап оқуға баулу мақсатында бірнеше жобалар жүзеге асырылып келеді.
