Кентау қалалық полиция бөлімінің бастығы Үсіпбеков Сұлтанбек Асанұлы өткен жылы атқарылған жұмыстарын қорытындылап, қала халқы алдында есеп берді. Есеп беру жиынын қала әкімінің орынбасары А.Байболова ашып, күн тәртібіндегі мәселелермен таныстырды. Жиынға «Amanat» партиясы Кентау қалалық филиалының төрағасы А.Басаров, қоғамдық кеңес мүшелері және қала тұрғындары қатысты.
Алдымен қалалық полиция бөлімінің басшысы, полковник С.Үсіпбековке жылдық есептік баяндама жасады.
Кентау қаласы көлемінде өткен жылдың 12 айында 252 қылмыстық құқықбұзушылық тіркелген. Қылмыстың саны былтырғы жылдың осы мерзімімен салыстырғанда 72 қылмысқа төмендеген. Аса ауыр қылмыстар 2022 жылмен тең болса, ауыр, орта дәрежелі және онша ауыр емес қылмыстар төмендеген. Зорлау қылмыстары (1-ден 3-ке) өсіп отыр. Денеге ауыр зиян келтіру, алаяқтық, бөтеннің мүлкін ұрлау, оның ішінде пәтер және мал ұрлық қылмыстары төмендеген.
Сөз соңында бөлім басшысы «алдағы уақытта құқықбұзушылық пен қылмысқа қарсы күрес барысында жедел-қызмет жұмыстарын күшейтіп, алдын алуға бағытталған жұмыстар атқаруға барлық күш-жігерімізді жұмсайтын боламыз»- деп баяндамасын аяқтады.
Тұрғындар тарапынан ұсыныс-талаптар мен шағымдар айтылды. Қалалық полиция бөлім басшысы бірқатарына заң аясында жауап беріп, аталған мәселелердің барлығы дерлік бақылауға алынатынын атап өтті.
