Түркістан облысы Сарыағаш ауданында биылғы жылдың жоспарына сәйкес 410 азаматқа әлеуметтік жұмыс орындарын ұйымдастыру жоспарланып, нәтижесінде өтінім қалдырған 382 азамат 10 айлық мерзімге жұмысқа жолданды.
Аталған әлеуметтік жұмыс орындарына қатысу ұзақтығы 12 айдан аспайды. Сонымен қатар жалақыны жұмыс беруші белгілейді. Жалақының 35%-ын мемлекет субсидиялайды, сомасы 20 АЕК мөлшерінен аспауы қажет. Қалған соманы жұмыс беруші өзі төлейді.
Ал, үкіметтік емес ұйымдар құрған әлеуметтік жұмыс орындарына жұмысқа орналасқан мүгедектігі бар адамдар үшін жалақының белгіленген мөлшерінің 70%-ын мемлекет өтейді. Оның да сомасы 20 АЕК мөлшерінен аспайды.
Биыл Сарыағаш ауданының тұрғыны І. Сембиев мырза әлеуметтік жұмыс орындарына өтінім қалдырып, мамыр айынан бастап аталған бағдарлама аясында уақытша жұмыспен қамтылды.
Айта кетейік бағдарламаға жұмыссыз мәртебесіне ие азаматтар қатыса алады. Бұл бағытта әлеуметтік осал таптарына басымдық беріледі.
