Түркістан облысының әкімі Нұралхан Көшеровтің төрағалығымен өткен апталық аппарат отырысында көктемгі су тасқынына дайындық шаралары кеңінен талқыланды. Атқарылған жұмыстар мен алдағы жоспарлар сараланды.
Түркістан облысындағы көктемгі су тасқынының алдын алу шаралары тұрақты жүргізілуде. Жағдай – тұрақты.
Нұралхан Көшеров жағдайды қатаң бақылауға алуды тапсырды. Инженерлік техникаларды үнемі дайындықта ұстауды, «Шардара» және «Бөген» сияқты көлемі 80 пайыздан асқан су қоймаларының қауіпсіздігін қамтамасыз етуді, су өткізу жүйелерін ұдайы таза ұстауды, таулы аумақтағы дайындықты күшейтуді жүктеді.
Жиында су тасқынына дайындық іс-шаралары туралы Түркістан облысының төтенше жағдайлар департаментінің бастығы Асқар Төлешевтің баяндамасы тыңдалды. Оның айтуынша, тәуліктік кезекшілік штабы ұйымдастырылған. Аймақтағы төтенше жағдайларға және су шаруашылығы нысандарына тұрақты мониторинг жүргізіліп келеді. Өзендерде судың өтуі орта деңгейден төмен ағуда. Су қоймалардың толуы 37 %-ды құрап отыр. Сырдария өзенінің жағдайы тұрақты бақылауда. «Шардара» су қоймасынының толу деңгейі 87 % болса, «Көксарай» су реттегішінің толу деңгейі – 33 %.
«2024-2025 жылғы қыс-көктемгі су тасқынына қарсы инженерлік іс-шаралар» жоспарында 39 іс-шара бекітіліп, оның 30-ы толық аяқталған. Нәтижесінде, Арыс қаласы, Келес, Сарыағаш, Төлеби, Сайрам, Сауран аудандарындағы 95 шақырымға жуық қашыртқы арналар механикалық тазалаудан өткізілді. Сарыағаш қаласында каналдардың 350 метрі бетондалды. Сонымен қатар 46 шақырым өзендерде арна түзету және жаға бекіту жұмыстары жүргізілді. Атап айтқанда, Сайрам ауданында Арыс өзенінде 2,5 шақырым, Сауран ауданында Жаңақорған өзенінде 15 шақырым, Құрсай өзенінде 8 шақырым, Тастақсай өзенінде 2 шақырым, Қарашық өзенінде 18,7 шақырым арна түзетілді. Сауран, Отырар аудандарында каналдардың бас жағына 5 тоспа орнатылды.
Одан бөлек, «2024-2025 жылғы күз-көктемгі су тасқыны кезеңіндегі төтенше жағдайлардың алдын алу іс-шараларын жүргізу» жоспары аясында тиісті жұмыстар атқарылған. Нақтырақ айтқанда, 491 шақырым арық, 654 шақырым канал, 30 шақырым дюбинг-өткелдер тазалаудан өткізілді.
Аталған жұмыстарды жүргізуге жалпы саны 263 техника жұмылдырылған. Бұдан бөлек, су тасқыны кезеңіне 129,8 мың қап құм мен инертті материалдар дайындалды. Төтенше жағдай қауіпі туындағанда ыстық тамақ пен тұрмыстық қажеттіліктер үшін кәсіпкерлермен 77 меморандум түзіліп, 148,1 тонна жанар — жағармай дайындалды. Республикалық, облыстық маңыздағы жолдардағы, темір жол астындағы өткелдер қоқыстан тазартылды.
Көктемгі су тасқыны кезеңінде төтенше жағдайлардың алдын алу мақсатында жалпы 1064 жеке құрам, 124 техника, 11 қайық пен 92 мотопомпа дайындыққа келтірілген.
Мәжіліс барысында Облыстық жұмылдыру даярлығы, аумақтық қорғаныс және азаматтық қорғау басқармасының басшысы Санжар Бүрлібаев көктемгі су тасқыны кезеңіне дайындық шаралары мен алдағы жұмыстар туралы баяндады. Оның мәлімдеуінше, облыс аумағындағы су тасқыны жағдайы қалыпты, алдын алу жұмыстары тұрақты бақылауда. Азаматтық қорғау қызметтері мен күштері дайындыққа келтірілген.
Түркістан облысы әкімінің тапсырмасына сәйкес, облыс аумағында су тасқынын алдын алу мақсатында «2025-2026 жылғы қыс-көктемгі су тасқынына қарсы инженерлік іс-шаралар» жоспарының жобасы әзірленді. Жоспарға 23 іс-шара енгізілген. Іс-шаралар жоспары аясында қажеттілігіне қарай өзен арнасын түзету, қорғаныс дамбаларын қалпына келтіру, автомобиль жолдарындағы су өткізу дюбингтерін ұлғайту және каналдар мен коллекторларды механикалық тазартудан өткізу, көпірлерді күрделі жөндеуден өткізу жұмыстарын жүргізу көзделген.
Түркістан облысы әкімдігінің баспасөз қызметі