Наурыз – халқымыздың ең маңызды, ең шынайы мерекелерінің бірі. Бұл тек табиғаттың жаңаруы ғана емес, адамның да рухани тазаруы, өткенге көз жүгіртіп, жаңа жылға үмітпен қадам басу кезеңі. Наурыздың бастамасы ретінде тойланатын 14 наурыз – «Көрісу күні» немесе Амал мерекесі де ұлттық дәстүріміздің жарқын көрінісі.
Таң атысымен қала көшелерінде мерекелік көңіл-күй орнады. Қоғамдық көліктерде ұлттық әндер шырқалып, жолаушыларға дәстүрлі музыка мен халық әндері ұсынылса, қаланың қапасы саналатын әуежай мен темір жол воқзалы маңы да ән-жырға бөленді.
Көрісу жоралғысы – Астана алаңында да өтті. Мұнда мәдениет және өнер өкілдері арнайы қойылымдар ұйымдастырып, қала тұрғындарына ізгі тілектерін арнады. Ж.Шанин атындағы қазақ драма театры, Өзбек театры, Шымкент қалалық әзіл-сықақ және сатира театры, Жастар театры, Әл-Фараби атындағы кітапхана және «Шымкент концерт» ұйымының өкілдері қазақ халқының берекелі дәстүрлерін дәріптеп, күннің шырайын ашты.
Қала тұрғындары мен қонақтарының көп жиналатын орындары – сауда орталықтарында да Көрісу рәсімдері өтті.
Бұл іс-шаралар ұлттық мәдениеттің заманауи ортада да өз орнын тауып, дәстүр сабақтастығы үзілмейтінін дәлелдеді.
Көрісу күні – тек мерекелік шара ғана емес, ата-бабамыздан келе жатқан ізгіліктің, сыйластықтың, кешірімділіктің символы. Бұл күнде адамдар бұрынғы өкпе-назды ұмытып, бір-біріне жылы лебіздерін білдіреді, қариялар бата беріп, жастар үлкендерге құрмет көрсетеді. Міне, қаламызда өтіп жатқан «Наурызнама» онкүндігі осы дәстүрлерді жаңғыртып, қала тұрғындарына ерекше қуаныш сыйламақ. Бұл күн – әр қазақтың жүрегіне жылу беретін, ынтымақ пен бірлікті нығайтатын ұлы күн. Амал мерекесі құтты болсын!
«Шымкент келбеті»
