ЕСКІ ИҚАН АУЫЛДЫҚ ОКРУГІНІҢ ӘЛЕУМЕТТІК-ЭКОНОМИКАЛЫҚ ДАМУЫ БОЙЫНША ЕСЕП БЕРУ КЕЗДЕСУІ ӨТТІ

Сауран ауданына қарасты Ескі Иқан ауылдық округінде Қазақстан Республикасының Президенті Қасым-Жомарт Тоқаев тапсырмасына сәйкес халықпен есеп беру кездесуі өткізілді. Жиынға Сауран ауданының әкімі Мақсат Таңғатаров қатысып, аудан көлемінде атқарылып жатқан жұмыстар мен алдағы жоспарларға тоқталды.
Кездесу барысында аудан әкімі Мемлекет басшысының халықпен ашық әрі тұрақты кері байланыс орнату жөніндегі тапсырмасы аясында мұндай есеп беру кездесулерінің маңыздылығын атап өтті. Сонымен қатар, тұрғындардың ұсыныс-пікірлері мен өзекті мәселелерін назарға алып, оларды кезең-кезеңімен шешу бағытында тиісті жұмыстар жүргізілетінін жеткізді.
Жиында Ескі Иқан ауылдық округінің әкімі Дилшад Саитов 2026 жылдың алғашқы төрт айында атқарылған жұмыстар бойынша есеп беріп, округтің әлеуметтік-экономикалық даму көрсеткіштеріне кеңінен тоқталды. Ауылдық округ құрамындағы Ескі Иқан және Машһүр Жүсіп елді мекендерінде бүгінде 21 316 халық тұратыны айтылып, бюджет, салық түсімдері, инфрақұрылым және коммуналдық саладағы жұмыстар таныстырылды.
Кездесуде коммуналдық салаға қатысты атқарылып жатқан жұмыстар бойынша тұрғын үй-коммуналдық шаруашылығы және тұрғын үй инспекциясы бөлімі басшысының орынбасары Ақселеу Сейденбек баяндама жасады. Табиғи газбен қамту, ауыз су жүйелерін жаңғырту, электр желілерін ауыстыру және санитарлық тазалық бағытындағы жұмыстар жөнінде мәлімет берілді.
Жер қатынастары бөлімінің басшысы Асылбек Патсаев жер саласына қатысты өзекті мәселелер бойынша баяндама жасап, тұрғын үй құрылысына жер беру, жайылым жерлерді тиімді пайдалану және инфрақұрылым жүргізу бағытындағы жұмыстарға тоқталды. Ал жұмыспен қамту және әлеуметтік бағдарламалар бөлімінің басшысы Дауырхан Асылбеков халықты жұмыспен қамту, атаулы әлеуметтік көмек көрсету және әлеуметтік осал топтарды қолдау бағытындағы атқарылған жұмыстар туралы есеп берді.
Жиында аудан әкімі Мақсат Таңғатаров Сауран ауданының әлеуметтік-экономикалық даму көрсеткіштері жөнінде баяндама жасап, аудан көлемінде жүзеге асырылып жатқан инвестициялық және инфрақұрылымдық жобаларға тоқталды. Әсіресе, Ескі Иқан ауылдық округінде қолға алынған мал бордақылау алаңдары мен сервистік мал сою кешендерінің құрылысы ауыл шаруашылығы саласының әлеуетін арттыруға мүмкіндік беретіні атап өтілді. Жалпы инвестициялық құны 6,5 млрд теңгені құрайтын жобалар аясында жаңа жұмыс орындарын ашу көзделуде.
Кездесу соңында тұрғындар тарапынан қойылған сұрақтарға жауаптар беріліп, ұсыныс-пікірлер тыңдалды. Жиында көтерілген мәселелер хаттамаға енгізіліп, жауапты бөлім басшыларына нақты тапсырмалар жүктелді.