Бүгін Жетісай аудандық «Тілдерді оқыту және дамыту орталығы» коммуналдық мемлекеттік мекемесінің ұйымдастыруымен аудандағы аралас тілді мектептер мен арнаулы орта оқу орындарының этнос жастары арасында «Мемлекеттік тіл – менің тілім» тақырыбында аудандық байқау өтті. Мемлекеттік тілдің қолдану аясын кеңейту, тіл мәртебесін көтеру, этнос өкілдері арасында қазақ тілін жетік меңгерген білімді әрі талантты жастарды анықтау, марапаттап, қолдау көрсету мақсатында ұйымдастырылған байқауға 10 этнос жастары қатысты. Байқауға Ғ.Мұратбаев атындағы Жетісай гуманитарлық-техникалық колледжі директорының оқу-өндірістік жұмысы жөніндегі орынбасары, қазақ тілі мен әдебиеті пәнінің оқытушысы С.Аташев, аудандық «Жаңа Жетісай» газетінің жауапты хатшысы Э.Өсербекова, «Тұран» мектеп-гимназиясының мұғалімі З.Асқарова қазылық етті. Байқауды Жетісай ауданының мәдениет, тілдерді дамыту, дене шынықтыру және спорт бөлімі басшысының кеңесшісі, спорт майталманы, ауданның құрметті азаматы М-Б Жанбырбаев пен «Тілдірді оқыту және дамыту орталығының» басшысы Қ.Рысмаханов ашып беріп, қатысушыларға сәттілік тіледі. М.Жұмабаев пен С.Торайғыровтың 130 жылдығына орай өткізілген байқаудың шарты бойынша қатысушы жастар өздерін таныстырып, ақынның өлеңдері мен прозалық шығармаларын жатқа айтып, байқау шарттарын түгел орындады. Байқау қорытындысы бойынша «Ю.Гагарин» атындағы ЖОМ оқушысы В.Штыкель Бас жүлдені, Жетісай медициналық колледжінің студенті А.Товашарова жүлделi бiрiншi орынды иеленсе, «Асықата» ЖОМ оқушы З.Бекова екінші орынға шықты. Ал «Ғ.Мұратбаев» атындағы ЖОМ оқушысы Н.Әмір үшінші дәрежелі дипломмен марапатталып, қалған қатысушылар белсене қатысқаны үшін Алғыс хаттармен марапатталды. Барлық қатысушыларға ұйымдастырушылар тарапынан бағалы сыйлықтар табысталды. Айта кету керек, Бас жүлдені иеленген үміткер «Мемлекеттік тіл –менің тілім» атты облыстық байқауға қатысатын болады.
