Кәсіпкерлікті дамыту — нарықтық экономиканы дамытудың кепілі. Сондықтан да кәсіпкерлікті дамыту, оның төңірегіндегі көптеген мәселелердің экономикадағы рөлінің аса маңыздылығын дәлелдейді. Шағын бизнесті дамытуды басқару еліміздің жүзеге асырып жатқан саясатының стратегиялық мәселесі болып табылады.
Бүгінгі таңда Сарыағаш ауданында шағын және орта бизнестің дамуына ерекше мән берілуде. Әсіресе мемлекеттік гранттар біраз адамның кәсіп бастауына баспалдақ болып келуде.
Осыған орай, Сарыағаш ауданының әкімі Арман Абдуллаев аудандағы мемлекеттік грант алып кәсіп ашқан Жібек жолы ауылдық округі, Зортөбе елді мекенінің тұрғыны Н.Аталованың жұмысымен танысты, деп хабарлайды аудан әкімінің баспасөз қызметіне сілтеме жасаған aisnews.kz.
Н.Аталова ағымдағы жылдың сәуір айында мемлекеттік грант алып, үй іргесінен шағын наубайхана ашқан. Мемлекеттік грант керекті құрал-жабдықтар сатып алуына үлкен септігін тигізгенін айтады.
Қазіргі таңда нан өнімдеріне сұраныс бар екенін, тапсырыстарды орындап жатқандығын жеткізді. Бүгінде мұнда дәмі тіл үйіретін тәтті нан өнімдері дайындалуда.
Содан соң, аудан әкімі Арман Абдуллаев Дихан баба елді мекеніне арнайы барып, М.Абельдинованың тігін цехымен танысты. Кәсіпкер «Назипа ана» тігін цехын ашып, грант қаражатына тігін машиналарын, оларға қажетті қосалқы бөлшектерін алып, кәсібін бастап 3 адамды жұмыспен қамтып отыр.Бүгінде ол тапсырыспен ұлттық нақышта безендірілген көрпе-жастықтар, қыз жасауларын және басқа да қажетті дүниелерді тігеді. Бұл құрылғылар тігіннің ең қиын түрін де орындайды екен.
Сонымен қатар, аудан әкімі Арман Абдуллаев мемлекеттік грант алып қой шаруашылығын дамытып отырған Д.Садыковтың жұмысымен де танысты. Д.Садықов қой шаруашылығын дамытуды мақсат тұтып, мемлекеттік грант алып, асыл тұқымды «қисары» қой тұқымын сатып алған. Бүгінде үй іргелік қорасында мал басын көбейтіп кәсібін дөңгелетуде. Жеке кәсіпкер алдағы уақытта мал кәсібін ұлғайтуды жоспарлап отыр.
– Қазақта «Мал өсірсең қой өсір, пайдасы оның көл-көсір» деген қанатты сөз бар. Қой шаруашылығымен айналысу қазақтың қанында бар кәсіп ғой. Тәуекелге бел буып бастаған кәсібіңізге береке берсін. Мемлекеттік гранттың пайдасы мол. Яғни, бұл кәсіп бастауға-қармақ. Ары қарай кәсіпті алып кету сіздердің еңбектеріңізге байланысты,-деді аудан әкімі Арман Абдуллаев.
«Шағын кәсіп, елге нәсіп» демекші азын-аулақ қаржының өзі шаруаның көзін тапқан кейбір отбасыларға біршама көмек болып отыр. Ең бастысы ерінбей еңбек жандар ғана табысқа жетуде.
Айта кетсек, ағымдағы жылдың 6 айында жалпы 94 азамат мемлекеттік грант иегері атанды. Оның ішінде салалар бойынша:
-қызмет көрсету -21;
-тамақтандыру-12;
-ауыл шаруашылығы-61.