Түркістан облыстық білім басқармасына қарасты аудандық білім бөлімдерінде апта ішінде бірқатар ісшаралар ұйымдастырылды. Атап айтқанда:
САЙРАМ АУДАНЫНДА ТҰҢҒЫШ РЕТ ДӘСТҮРЛІ САДАҚ АТУДАН ХАЛЫҚАРАЛЫҚ АШЫҚ ТУРНИР ӨТТІ
Сайрам ауданына қарасты №24 М.Махажанов атындағы жалпы білім беретін мектепте Қазақстанның Жазушылар және Журналистер одағының мүшесі, ақын, осы мектептің тұрақты демеушісі Тыныбек Сатбаевтің 77 жасқа толу мерейтойына арналған дәстүрлі садақ атудан Халықаралық ашық турнир болып өтті.
Жарысқа Алматы, Астана, Шымкент қалалары мен Ұлытау, Түркістан облысынан және Өзбекстан, Қырғыстан, Туркия елдерінен келген мергендер жеке және командалық жарыстарға қатысып, өз мемлекеттерінің намысын қорғады. Сондай-ақ сайыста аталған білім ордасының 7-10, 11-15 жас аралығындағы мектеп оқушылары қатысып, аудан абыройын көрші мемлекеттер алдында асқақтатып, жүлделі орындарға ие болды.
Командалық сайыс 30 метр қашықтықтағы жамбы нысанасын атудан өтті. Қырғыстан Республикасынан келген мергендердің капитаны, әлем чемпионы Ынтымақ Мурадұлы бастаған команда I орынды иеленді. Ұлытау облысынан келген мергендер II орынды иеленсе, Шымкент қаласы және Өзбекстан Республикасынан келген мергендер III орын иеленді.
№24 М.Махажанов мектебінде «Садақ ату» үйірмесі мектеп басшылығының қолдауымен 2019 жылы ашылған. Дәстүрлі садақ үйірмесіне Ұлттық спорт ойындарының білім магистрі, Республикалық «Спорт жұлдыздары» журналының тілшісі, Қазақстан және Халықаралық Журналистер одағының мүшесі, аудандық «Үздік педагог-2022» байқауының жеңімпазы Сатбаев Маханбек Тұрарбекұлы жетекшілік етеді.
Ұлттық спортты ұлықтап жүрген спортшыларымызға сәттілік тілейміз!
ТҮРКІСТАНДЫҚ ОҚУШЫЛАР РЕСПУБЛИКАЛЫҚ ПІКІРСАЙЫС ТУРНИРІНЕН ЖҮЛДЕЛІ ОРАЛДЫ
Жетісу облысының білім басқармасы дене тәрбиесі, спорт, алғашқы әскери дайындығы және қосымша білім берудің ғылыми-тәжірибелік орталығы Жетісу облысы білім басқармасы мен «Жас ұрпақ» жастар қоғамдық бірлестігімен бірлесе отырып өскелең ұрпақтың Қазақстандық патриотизмі мен азаматтылығын қалыптастыру, оқушылардың бойында жауапкершілік, республикадағы пікірсайыс қозғалысын дамыту, насихаттау және қолдау мақсатында жалпы орта білім беру ұйымдарының білім алушыларының арасында жуырда Талдықорған қаласында «Жаңа Қазақстанның болашағы — Зерделі ұрпақ» атты Республикалық пікірсайыс турнирі болып өтті.
Турнирге Түркістан облысы атынан «Саналы ұрпақ» командасы, Кентау қаласы, М.Қашғари атындағы мектеп-лицей оқушылары ағылшын және орыс лигаларына қатысты.
Пікірталасшылар республикалық турнирде тартысты өнер көрсетіп, ағылшын лигасы бойынша Изатуллаева Лайло Икрамжанқызы, Насируллаева Барно Рухиллақызы ІІІ дәрежелі дипломмен, орыс лигасы бойынша Анварова Алтинай Максудқызы «Үздік спикер» номинациясымен марапатталып жеңіске жетті.
Жетекшілері Амин Зумрад Сатыболдыкизы, Мухитдинова Захира Акажановна.
Жеңістеріңіз құтты болсын жеңімпаздар!
ӘЛЕУМЕТТІК ӘРІПТЕСТІК КЕЛІСІМ АЯСЫНДА ҚҰҚЫҚТЫҚ ОҚУ- СЕМИНАРЫ ЖҮРГІЗІЛДІ
«Қазақстандық салалық білім және ғылым қызметкерлері кәсіптік одағының Түркістан облыстық ұйымы» ҚБ мен «Қазақстандық оқу-ағарту, ғылым және жоғары білім қызметкерлерінің салалық кәсіптік одағы» ҚБ құқықтық бөлімімен бірлесіп әлеуметтік әріптестік туралы келісімнің аясында бастауыш кәсіподақ төрағаларына құқықтық оқу-семинарын өтті.
Шараға Түркістан, Кентау қалалары және Сауран ауданы білім беру ұйымдарындағы тиісті мамандар қатысты.
Оқу-семинарына арнайы Салалық кәсіподақтың құқықтық жұмыстар бөлімінің жетекшісі Қыдырбаева Райхан Мамашиқызы келіп, облыстағы бастауыш кәсіподақ ұйымының төрағаларына құқықтық кеңес берді. 83-бұйрыққа енгізілген өзгерістер бойынша түсіндірме жұмыстары жүргізілді.
Педагогтарды аттестациялау бойынша басымдық беріліп, заңнамаларын толыққанды түсіндірді. Қолданыста бар нормативтік актілер жайында құлағдар етті.
Семинар барысында мамандар бір-бірімен тәжірибе алмасып, диалог ретінде сұрақ-жауаптар ұйымдастырылды. Пайдалы жиын нәтижесінде қатысушылар өз ойларын ашық жеткізіп, көкейдегі сауалдарына тиісті жауап алды.
Айта кетейік, аталмыш семинар 13 қарашадан басталып, 3 күнге жалғасады.
«ӘЛЕМДІ МЕЙІРІМДІЛІК ҚҰТҚАРАДЫ» АТТЫ АПТАЛЫҚ БАСТАУ АЛДЫ
Сайрам ауданының білім бөліміне қарасты білім беру ұйымдарында 2023 жылдың қараша айының 13-17 күндері аралығында «Әлемді мейірімділік құтқарады» атты психологиялық қызметінің апталығы ұйымдастырылуда.
Мақсат — психологиялық қызметтің жұмысын насихаттау, мектеп ұжымының ауызбіршілігін, ынтымақтастығын қалыптастыру, ұжымда бір-бірін қолдауға, өз ісінің белсенді маманы болуға деген қабілетін арттыру. Оқушылардың бір-біріне деген қарым-қатынасын нығайту, өзара жағымды қарым-қатынас жасауға дағдыландыру, ұйымшылдыққа тәрбиелеу, әлеуметтік ортада өзін еркін ұстауға және өз ойын еркін жеткізуге үйрету.
Нәтижесінде, жасөспірімдер арасындағы аутодеструктивті мінез-құлық пен құқықбұзушылық, зорлық-зомбылық, ерте жүктілік мәселесін болдырмау, алдын алу жолдары ұсынылады, бала тәрбиесіндегі ата-ана рөлін нығайтып, мектеп пен ата-аналардың тығыз байланысына ықпал етеді, жеке тұлға қалыптастыруда отбасы тәрбиесінің ерекшеліктерін көрсете отырып, салауатты өмір сүруге қызығушылықтарын оятады, ата-ананың балаға тәрбиелік ықпалын арттырады.
Осыған орай бүгін барлық мектептерде «Бақытты күн» айдарымен психологиялық қызметінің апталығының ашылуы өткізіліп, оқушылардың мектепке қандай көңіл-күймен келгенін бақылап, көңіл-күйін көтеру, көңіл-күйін реттеу мақсатында топтық «Қимылды жаттығу», «Бақыт мен үшін ол…» акциясы ұйымдастырылды.
ЖАС ШЕБЕРДІҢ ҚОЛӨНЕР БҰЙЫМДАРЫНА ҚЫЗЫҒУШЫЛЫҚ АРТУДА
Ордабасы ауданының білім бөліміне қарасты С.Нұрмағанбетов атындағы жалпы білім беретін мектебінің 10-сынып оқушысы Ибрагим Аяна Даниярқызы — өз өнері мен таланты арқылы шығармашылығын шыңдап жүрген жас талант. Аяна жеңіл мрамор материалдарынан қош иісті балауыздар, теңіз қабыршығы, алтын-күміс әшекей бұйымдарын салуға арналған қобдишалар және т.б. қолөнер бұйымдарын жасауды сүйікті ісіне айналдырған. Суреттен көріп тұрғандай, бұл заттарды күнделікті үй жабдықтарына қолдануға әбден болады.
Қазіргі таңда жас таланттың жасаған бұйымдарын тойбастар ретінде, жақын туыстарына бағалы сыйлық ретінде сыйлауға қызығушылық танытқандар саны артуда. Аяна — көркемөнер саласын дамытуға үлес қосып жүрген жас өрен.
