Түркістан облысы білім басқармасының басшысы Ғалымжан Сұлтанбекұлы Сайрам ауданына жұмыс сапарымен барды. Білім мекемелерінің қауіпсіздігін бақылап, қысқы маусымға дайындығын пысықтады.
Алдымен Сайрамдағы «Айнабұлақ» жалпы орта мектебінің жағдайын көрді. 1991 жылы пайдалануға берілген 1 қабатты білім ордасында 600ден астам бала оқиды. Мектеп қатты отынмен жылынады. Алайда көмірдің қоршаусыз, сыртқа жатқанын көрген Ғалымжан Сұлтанбекұлы мектеп директорына шатыры бар, жаңбыр қардан қорғалатын таса жерге ауыстыруды тапсырды. Мектептің ішіндегі орындықтардың тозығы жеткен, оларды жаңартып, балалардың таза, ыңғайлы жерде білім алуын қамтамасыз етіңдер деді басқарма басшысы. Асханасының іші тар. 267 бала бірнеше легпен бір реттік ыстық тамақ ішеді.
Келесі 9 жыл бұрын қолданысқа берілген №67 «Көмешбұлақ» жалпы орта мектебіне барған басқарма басшысы мектептің жылыту жүйесін тексерді. Әзірге қатты отын арқылы жылынатын білім ұясы, газға өтеді. Қорда 235 тонна көмір бар. Олардың сақталу тәртібі де қарастырылған. Қауіпсіздік жағы толық қамтамасыз етілген.
№ 49 Ш.Уалиханов атындағы жалпы білім беретін мектеп 2009 жылы пайдалануға берілсе де, ғимараттың төменгі қабаты, асханасы қауіпті аймақта. Апатты деп танылған бір бөлігі. Қазіргі таңда, тегін тамақ ішетін 200-ден астам балаға 2 сынып қосымша қарастырылған. Ғалымжан Сұлтанбекұлы қауіпті аймақты блоктар үшін күрделі жөндеу жүргізу жұмыстарын жылдамдатуды тапсырды.
Басқарма басшысы Сайрам ауданындағы сапары барысында №59 «Қ.Жандарбеков» жалпы орта мектебіне келді. Білім ордасының қоршауын бірден тексеріп, мердігердің жұмысын сынға алды. Оны назарға нықтап ұстамаған мектеп басшылығына да ескерту берді. Жаңа қоршаудың тірек темірлерін бос қойып, астындағы цементін дұрыс құймаған. Бос, үгітіліп тұр. Ғалымжан Сұлтанбекұлы мұндай жағдайда мердігердің жұмысын жарамсыз деп танытып, қайта реттетуге болатынын айтты. Мекеменің қасбеті ескірген. Қайта жөндеуді қажет етеді. Білім ошағындағы дұрыс орнатылмаған бейнекамераларды байқаған басқарма басшысы, камераларды жаңартып, қосымша алдырту керектігін тапсырды. Интернет жылдамдығы да көңіл көншітпей тұр. Тиісті басқармаға хат жолдап, реттеу керектігін айтты.
Ал, жалпы мектептің асханасы, спорт залы мен әжетханасының да жағдайы жақсы. Дабыл батырмасы жұмыс істеп тұр. Мектеп қорында 270 тонна көмір бар.