Елімізде жаңартылған білім беру мазмұнына сәйкес, 30 қараша күні №3 Ломоносов атындағы жалпы білім беретін мектебінде Сарыағаш ауданы білім бөлімі тарих және география пәнінің әдіскері Ахметбаева Райгүлдің ұйымдастыруымен «Жаңартылған мазмұндағы мектеп географиясын оқытудағы геоақпараттық технологиялардың қолданбалы негіздері» атты тақырыпта Абай атындағы ҚазҰПУ-дың жас ғалымдары география пәні мұғалімдеріне арналған шеберлік сыныбын өткізді. Тәжірибелік сынып сағатына аудан көліміндегі 78 білім ұясынан 67 мұғалім қатысты.
Аталған шеберлік сыныптың мақсаты- жаңартылған мазмұндағы география оқулықтарында сандық геоақпараттық технологияларды қолдану арқылы орындалатын тапсырмаларды практика жүзінде тиімді ұйымдастыру жолдары, цифрлық сауаттылықтарын арттыра отырып, геоақпараттық ресурстарды білім беруде қолдану аясын кеңейту.
Нұрмағамбетұлы Жанболат, Абай атындағы ҚазҰПУ-дың 1-курс докторанты
аталмыш тақырып аясында геоақпараттық технологияларды бірнеше сайттар арқылы өткізу мүмкіндіктерін көрсете отырып, пән мұғалімдерін тың ақпараттармен таныстырды. Шебер сыныпқа қатысқан мұғалімдер сертификаттармен марапатталды.
ГАЖ технологияларының қолдану арқылы орындалатын практикалық жұмыстарды жете меңгерген географтар ұйымдастырушылар мен спикерлерге алғысын жаудырып, тағы да шебер сынып сағаттары көптен ұйымдастырылса деген ұсыныстарын жеткізді.