Қорғаныс министрлігінің Ақпараттық десанты Арыс қаласының әскерге шақырылуға дейінгі жастарымен бірқатар әскери-патриоттық іс-шаралар өткізді. Жастар үшін Қазақстанның қазіргі заманғы армиясының түрлі қару-жарақтары ұсынылды, сондай-ақ Кеңес Одағының Батыры, Халық Қаһарманы, тәуелсіз Қазақстанның тұңғыш Қорғаныс министрі армия генералы Сағадат Нұрмағамбетовтың ғасырлық мерейтойына арналған «Халық жүрегіндегі батыр» көшпелі көрмесіне экскурсия өткізілді.
Жиынға қала әкімі Гүлжан Құрманбекова, ҚР ҚК Бас штабының тәрбие және идеологиялық жұмыстары департаментінің өкілі подполковник Дәулет Бейсеков, ардагерлер мен сарбаздар, әскери патриоттық клуб мүшелері, оқушылар қатысты.
Шаһар басшысы мұндай акцияның жастардың бойында патриоттық құндылықтарды қалыптастырудағы маңыздылығын ерекше атап өтті.
«Арыс қаласының жастары дәстүрлі түрде өткізілетін «Айбын» әскери-патриоттық жарыстарынан ешқашан жүлдесіз қайтқан емес. Бұл біздер үшін үлкен мақтаныш. Оындай тағылымы мол шаралар Арыстың отаншыл жастарының көбеюіне зор септігін тигізеді деп санаймын. Өйткені — егемен елдің ертеңі – айбынды жастар!» — деді Гүлжан Мамытқызы.
Қаламыздағы екі мектепте өткізілген іс-шаралардың мақсаты жастарға заманауи әскери жетістіктерді көрсету ғана емес, сонымен қатар Отан қорғаушы мамандығының маңыздылығы туралы айту болды. Кәсіби әскери қызметшілер өз білімдері мен тәжірибелерімен бөлісіп, тыңдаушыларды болашақ Отан қорғаушыға да, кез келген адамға да қажетті моральдық-психологиялық қасиеттермен «қаруландыруға» тырысты.
— Осындай шаралар арқасында қатысушыларымыз «өз елінің азаматы болу» ұғымының мағынасын жақсы түсіне алды. Іс-шаралар барысында жастарға әскери қызметпен танысуға және практикалық дағдылар алуға мүмкіндік беріп қана қоймай, оларда патриоттық рух пен азаматтық міндеттер туралы хабардар етті. Бұл елімізді және оның құндылықтарын қорғауға дайын жастар аудиториясын құруға ықпал етеді, — деп атап өтті подполковник Дәулет Бейсеков.
Мұндай кездесулердің тәрбиелік мәні де болды. Жергілікті мектептер мен оқу орындарының студенттері әскери қызметтің физика, математика, инженерия және т.б. сияқты әртүрлі ғылымдармен қалай байланысты екенін көрді. Бұл оларға әскери саладағы мамандықтардың қаншалықты алуан түрлі және қызықты екеніне көз жеткізуге мүмкіндік берді.
Бұдан кейін, қалалық мәдениет үйінде ҚР Қарулы күштері Ұлттық әскери-патриоттық орталығы Орталық ансамблінің әншілері концерт қойып, көрермендерге елге деген мақтаныш сезімін ұялатқан керемет көңіл-күй сыйлады.
