Балалар мен әйелдерге қатысты жасалатын отбасындағы тұрмыстық зорлық-зомбылықтың алдын алу мен болдырмауға, салдарын жоюға арналған форумға Жетісай ауданы әкімінің орынбасары Тұрышбек Елшібаев аудан прокурорының орынбасары Ырысбек Ерназаров, Жетісай аудандық полиция бөлімінің басшысы Әділбек Сапарбеков пен дін саласының қызметкерлері, пробация есебінде тұратын азаматтар, мектеп директорларының тәрбие ісі жөніндегі орынбасарлары мен педагог-психологтары қатысты.
Жетісай ауданы прокуратурасы мен аудандық полиция бөлімінің, аудандық ішкі саясат бөлімінің ұйымдастыруымен «Жетісай – киелі шаңырақ, құт мекен!» айдарымен өткен жиында құзырлы орган басшылары өткен жылы зорлық-зомбылық фактілерінің нақты көрсеткіштері мен негізгі себептеріне жасалған зерделеу, отбасыдағы тұрмыстық зорлық-зомбылықтың алдын алу мақсатында атқарылған жұмыстардың нәтижелері айтылып, алдағы атқарылар жоспарлары таныстырылды.
Сонымен қатар, форумда өскелең ұрпаққа ұлттық құндылықтарды дәріптеу, отбасы құрудағы жауапкершілікті ұғындыру, отбасыдағы қаржылық сауаттылықты арттыру, ажырасудың, отбасыдағы зорлық-зомбылықтың негізгі себептерін зерделеу жұмыстарының жоспарына сәйкес профилактикалық шараларды күшейту, ата-аналар мен азаматтық қоғам мүшелерінің жастарға дұрыс тәрбие беруге жұмылдыру керектігі айтылды.
Жиын соңында қатысушылармен кері байланыс орнатылып, ұсыныс-пікірлер талқыланды.