Бүгін Ордабасы ауданының әкімі Азат Оралбаев жұмыс сапарымен Төрткүл ауылдық округіне барды. Аудан басшысы алдымен Спатаев елді мекеніне табан тіреп, Батыс Қытай — Батыс Еуропа автодәлізінің бойындағы сауда қатарының жұмысымен танысты, деп жазады ауждан әкімінің баспасөз қызметіне сілетме жасаған aisnews.kz. Қазіргі аталған нысанда ауылдық округте өндірілген өнімдер (қарбыз, қауын және т.б.) саудалануда. Сондай-ақ аудан әкімі Төрткүл елді мекенінде жүзеге асырылған сауда қатарында болып, жағдайымен танысып, саудагерлермен тілдесті. Бұл жерде де Төрткүлдің даласында пісіп жетілген өнімдер сатылуда.
Аудан әкімі сауда қатарларының алдына асфальт төсеу, жарықшамдар орнату және арнайы жазулар жаздыру бойынша мүмкіндіктерді қарастыру туралы ауыл әкіміне, аудан әкімінің жауапты орынбасарына және салалық бөлімнің басшысына бірқатар тапсырмалар берді. Сондай-ақ ауылдық округтің әкіміне аумақтық санитарлық-тазалығын қатаң бақылауға алуды міндеттеді.
Азат Әбдіғалиұлы Қызылжар елді мекеніндегі «Үміт» шаруа қожалығының егістік алқабында болып, егістікті әртараптандыруға бел буған шаруаның жұмысымен де танысты. Шаруа 10 Га астам алқаптың 6,5 Га-на түркиялық “Май” сортының мақтасын, 2 Га-на пияз, 2 гектарға жүгері еккен.
Аудан басшысы шаруаның тиісті мемлекеттік қолдауларды (тыңайтқыш, жанар-жағар май және т.б.) мерзімінде және қажетті көлемде алып жатқандығына көз жеткізіп, адал еңбегіне алғысын білдірді.