Өзбекәлі Жәнібеков атындағы ОҚПУ ғалымдары жасанды интеллектті педагогтың сенімді көмекшісіне айналдыратын жаңа ғылыми жобаны жүзеге асырмақ. Қазір мектепте мұғалімнің міндеті тек білім берумен шектелмейді. Ол — оқушының жеке дамуын бақылап, оның әлеуметтік-эмоционалдық жағдайын дер кезінде байқап, қажетті қолдау көрсете алатын маман. Алайда әрбір оқушының көңіл күйі мен психологиялық ахуалын күнделікті бақылау оңай емес. Сондықтан бүгінгі таңда білім беру саласында жасанды интеллект мүмкіндіктерін пайдалану өзекті бағыттардың біріне айналып отыр.
Жобаның ғылыми жетекшісі, философия докторы (PhD), қауымдастырылған профессор Перизат Әбдіразованың айтуынша, зерттеу барысында педагогика, психология және жасанды интеллект бағыттары біріктіріліп, оқушылардың әлеуметтік-эмоционалдық жағдайын талдауға және болжауға арналған интеллектуалды шешімдер әзірленеді. Ғалымдар жасанды интеллект көмегімен мұғалімдердің зерттеу құзыреттіліктерін дамытуға, сондай-ақ білім беру үдерісінде ғылыми негізделген шешім қабылдау мәдениетін қалыптастыруға басымдық беріп отыр.
Жоба аясында әлеуметтік-эмоционалдық жағдайды бағалаудың халықаралық тәжірибесі зерттеліп, арнайы деректер базасы жасақталады. Соның негізінде талдау және болжау алгоритмдері әзірленіп, мектептерде тәжірибелік сынақтан өткізіледі. Сонымен қатар педагогтерге арналған оқу-әдістемелік материалдар әзірленіп, оқыту семинарлары мен тренингтер ұйымдастырылмақ.
Жоба нәтижесінде халықаралық деңгейдегі ғылыми жарияланымдар дайындалып, білім беру саласына арналған инновациялық әдістемелік ұсынымдар әзірленеді. Сондай-ақ жас ғалымдарды даярлау, ғылыми семинарлар өткізу және мектептерде жасанды интеллект технологияларын тиімді қолдану тәжірибесін қалыптастыру көзделген. Бұл зерттеу мұғалімнің орнын жасанды интеллектпен алмастыруды емес, керісінше, оны заманауи технологиялармен қолдауды мақсат етеді. Ғалымдардың пікірінше, AI құралдары педагогке оқушылардың әлеуметтік-эмоционалдық ерекшеліктерін тереңірек түсінуге, тәуекелдерді ертерек анықтауға және ғылыми дәлелдерге сүйене отырып шешім қабылдауға мүмкіндік береді. Университетте жүзеге асырылып жатқан бұл жоба білім беру жүйесін цифрлық трансформациялау үдерісіне үлес қосып қана қоймай, мұғалімдердің кәсіби әлеуетін жаңа деңгейге көтеруге бағытталмақ.
