Өзбекәлі Жәнібеков атындағы Оңтүстік Қазақстан педагогикалық университетінің Басқарма төрағасы – Ректоры Қайрат Балабиев биыл алғашқы талапкерлерін қабылдаған Гази университеті филиалының жұмысын жандандыру және ғылыми-білім беру бағытындағы ынтымақтастықты кеңейту мақсатында Түркия республикасына арнайы іссапармен барды. Қазақстандық делегация құрамында сондай-ақ, ректор кеңесшісі Мұқаш Ескендіров, Ғылыми жұмыстар және инновациялар жөніндегі проректор Ержан Керімбеков бар.
Іссапар барысында делегация Гази университетінің ректоры, профессор Угур Уналмен кездесті. Кездесуде Гази университеті мен Өзбекәлі Жәнібеков атындағы ОҚПУ арасындағы ынтымақтастықты одан әрі дамыту мәселелері талқыланды. Тараптар Гази университеті филиалының қызметін халықаралық академиялық білім беру стандарттарына сәйкестендірумен қатар, ғылыми-зерттеу бағытындағы бірлескен жұмыстарды күшейтуге басымдық берді. Атап айтқанда, ортақ ғылыми жобаларды әзірлеу және жүзеге асыру, зерттеу жұмыстарына профессор-оқытушылар құрамын тарту, докторантура бағытындағы академиялық байланыстарды дамыту жөнінде нақты шешімде. Сонымен қатар, тараптар екі оқу орнының ғалымдары мен зерттеушілері үшін ортақ зертханалық базаларды тиімді пайдалану мүмкіндіктерін де қарастырды. Бұл бағытта біріккен ғылыми-зерттеу топтарын құру және заманауи технологиялар мен инновациялық әдістемелерді енгізу мәселелері сөз болды. Мұндай қадам қос университеттің де ғылыми әлеуетін арттырып, халықаралық деңгейдегі іргелі әрі қолданбалы жобаларды жүзеге асыруға жол ашады.
Арнайы іссапар аясында профессор-оқытушылар құрамы мен студенттердің академиалық ұтқырлығын арттыру мәселесіне де ерекше көңіл бөлінді. Келісім бойынша, екі елдің профессорлары дәріс оқып, тәжірибе алмасу үшін өзара сапарлайды. Ал магистратура мен докторантура білім алушыларына Гази университетінің жетекші ғалымдарының жетекшілігімен ғылыми тағылымдамадан өтуге және бірлескен зерттеулер жүргізуге жағдай жасалады.
Кездесуде сөз болған маңызды бағыттардың бірі – қос дипломды білім беру бағдарламаларын енгізу және білім сапасын халықаралық аккредиттеу стандарттарына сәйкестендіру. Гази университеті филиалында білім алатын қазақстандық студенттерге түрік білім беру жүйесінің үздік тәжірибелері ұсынылып, олардың еңбек нарығындағы бәсекеге қабілеттілігін арттыру көзделіп отыр.
Өз кезегінде Гази университетінің ректоры, профессор Угур Унал екі бауырлас ел арасындағы білім мен ғылым саласындағы байланыстардың стратегиялық маңызын атап өтті. Ол Өзбекәлі Жәнібеков атындағы ОҚПУ-мен серіктестікті өркендетуге және филиал жұмысын жан-жақты қолдауға дайын екенін білдірді. Түрік тарапы бірлескен жобаларды қаржыландыру мен ғылыми жарияланымдар сапасын көтеруде барлық қажетті көмекті көрсететінін жеткізді.
