Өзбекәлі Жәнібеков атындағы Оңтүстік Қазақстан педагогикалық университеті Академиялық адалдық лигасының мүшелігіне қабылданды. Бұл – университеттің академиялық адалдық қағидаттарын нығайтуға, басқару жүйесіндегі ашықтықты қамтамасыз етуге және білім беру сапасын арттыруға бағытталған жүйелі жұмыстарының нәтижесі.
Университеттің бұл жетістігінде Басқарма төрағасы-Ректор Қайрат Балабиевтің ұстанымы мен бастамаларының маңызы зор. Басшылық қызметіне кіріскен сәттен бастап ректор университет жұмысында ашықтықты, әділдікті, жауапкершілікті және талапшылдықты басты басымдықтардың бірі ретінде айқындады. Басқару үдерістерінің ашық болуы, қабылданатын шешімдердің әділдігі және әрбір қызметкердің өз міндетіне жауапкершілікпен қарауы университет қызметінің негізгі талаптарына айналды.
Ректордың осы бағыттағы нақты ұстанымы университет ұжымының академиялық мәдениетін жетілдіруге негіз болды. Ашықтықты талап ету – тек басқарушылық міндет қана емес, сонымен қатар университеттің барлық қызмет саласында сенім мен әділдік ортасын қалыптастыруға бағытталды. Академиялық адалдық лигасының мүшелігіне қабылдану – аталған ұстанымдардың институционалдық деңгейде нығая түскенін көрсетеді. Лига аясында академиялық адалдық стандарттарын сақтау, білім алушылардың білімін әділ бағалау, плагиаттың алдын алу, академиялық жауапкершілікті арттыру және озық тәжірибелермен алмасу бағытындағы жұмыстарды дамытуға мүмкіндік туады. Адалдыққа негізделген білім, ашықтыққа сүйенген басқару, әділдікке бағытталған даму – Жәнібеков университетінің ұстанымы.
Университеттің бұл беделді ұйымға енуі болашақ педагогтардың кәсіби жауапкершілігі мен біліктілігін де жаңа деңгейге көтеруге жол ашады. Қазіргі таңда сапалы білім беру мен әділ бәсекелестік ортаны қалыптастыру – заман талабы. Осы орайда, оқу орнында академиялық тазалық пен әдеп нормаларын берік ұстану білім алушылардың өзіндік ізденісін арттырып, бәсекеге қабілетті мамандар даярлауға тікелей ықпал етеді.
Сонымен қатар, лига стандарттарын енгізу аясында университетте ғылыми-зерттеу жұмыстарының ашықтығы қамтамасыз етіліп, студенттер мен жас ғалымдардың авторлық құқықтарын қорғау тетіктері күшейтіледі. Білім беру үдерісін цифрландыру, антиплагиат жүйелерін тиімді қолдану және бағалау жүйесінің ашықтығын арттыру арқылы оқу орны өңірдегі ғылыми-академиялық ортаның көшбасшысы ретіндегі позициясын бекемдей түспек.
Бұл маңызды қадам Өзбекәлі Жәнібеков атындағы Оңтүстік Қазақстан педагогикалық университетінің тек өңірлік емес, республикалық деңгейдегі беделін де арттырады. Адалдық пен әділдікті ту еткен оқу орны алдағы уақытта да сапалы білім мен озық ғылымды ұштастыра отырып, еліміздің ағартушылық саласына елеулі үлес қоса бермек.