Қазіргі таңда сапалы білім беру жүйесін қалыптастыру – мемлекеттік саясаттың басты басымдықтарының бірі. Осы орайда өңірдегі білім беру мекемелерін білікті де тәжірибелі педагог кадрлармен қамтамасыз ету, әсіресе мамандар тапшылығы байқалатын бағыттар бойынша қайта даярлау жүйесін жолға қою – стратегиялық маңызға ие. Мұхтар Әуезов атындағы Оңтүстік Қазақстан зерттеу университетінде бұл бағыттағы педагогтік қайта даярлау курстары 2021 жылдан бері табысты жүзеге асырылып келеді.
Аталған жоба басталған сәттен бастап осы уақытқа дейін 166 тыңдаушы курсты сәтті аяқтап, бүгінде өңіріміздің мектептері мен колледждерінде, білім беру ұйымдарында абыроймен еңбек етуде. Ал биылғы оқу жылында заманауи сұранысқа ие 11 білім беру траекториясы бойынша 42 тыңдаушы арнайы іріктеуден өтіп, оқуға қабылданды.
Бағдарламаның негізгі мақсаты – базолық педагогикалық білімі жоқ, бірақ білім беру саласына бет бұрып, педагогтік қызметке алғаш рет кірісетін жоғары білімді тұлғаларды кәсіби тұрғыда қайта даярлау болып табылады. Курс барысында тыңдаушыларға заманауи оқыту әдістемелері, инклюзивті білім беру негіздері, цифрлық технологиялар мен педагогикалық психология модульдері тереңдетіліп меңгертіледі. Бұл өз кезегінде өңірдегі педагог кадрлар тапшылығын азайтуға және білім беру сапасын арттыруға тікелей үлес қосуда.
Қазіргі уақытта тыңдаушылар оқу бағдарламасының ең маңызды бөлігі саналатын «Педагогикалық және кәсіби құзыреттілік» сонымен қатар «Педагогикалық шеберлік» модульдері бойынша теориялық оқудан өтіп, өзіндік ізденістерін кезекті емтихандар барысында сәтті дәлелдеп шықты.
Оқу үдерісінің жоғары сапасын университеттің тәжірибелі ғалымдары мен профессор-оқытушылар құрамы қамтамасыз етуде. Атап айтқанда, сабақтарды:
- Заурет Қабылбекова – Жалпы педагогика және психология кафедрасының профессоры, педагогика ғылымдарының докторы;
- Маржан Молдаханова – Жалпы педагогика және психология кафедрасының аға оқытушысы;
- Элмира Мүсірепова – Математика кафедрасының аға оқытушысы, философия докторы (PhD);
- Салтанат Арыстанова – «Биология және география» кафедрасының аға оқытушысы, философия докторы (PhD) жүргізеді.
Білікті оқытушылар тыңдаушылардың фундаменталды теориялық білімін тереңдетіп қана қоймай, заманауи сабақ жоспарлау, білім алушылардың ынтасын арттыру және аудиториямен жұмыс істеу сияқты практико-бағдарланған дағдыларын шыңдауға басты басымдық береді.
Мұхтар Әуезов атындағы Оңтүстік Қазақстан зерттеу университеті алдағы уақытта да педагог кадрлардың кәсіби әлеуетін арттыруға, үздіксіз білім беру идеясын ілгерілетуге және өңірдің білім беру саласын жүйелі дамытуға бағытталған ауқымды жұмыстарын үздіксіз жалғастыра береді.