Карантин режимінің сақталуын қатаң бақылауда

Еліміздегі үшінші мегаполисте Мемлекет басшысының Жолдауындағы тапсырмаға сәйкес коронавирус індетімен күресте белсенділік танытуда.
Қаланың Қаратау ауданының тәртіп сақшылары Сайрам тұрғын алабында орналасқан фастфуд орталығының карантин талаптарын бұзып, «Ашық» бағдарламасына тіркелмей, 21:30-ға дейін жұмыс жасап тұрғаны белгілі болды. Сонымен қатар, кәсіпкерлік нысан жұмысшылары медициналық бетпердесіз қызмет көрсеткен.
Қаланың бас санитарлық дәрігерінің Қаулысының талаптарын бұзып жұмыс істеп жатқан тағы бір кафе Абай ауданы аймағынан анықталды. Рейд барысында анықталғанындай кафе қызметкерлері бетперде кию талабын орындамай жұмыс істеген. Оған қоса кафе «Ашық» бағдарламасына тіркелмеген, әрі қаулымен шектелген уақыттан кейін келушілерді қабылдап қызмет көрсеткен.
Аталған жайт бойынша, жинақталған іс-құжаттар ҚР ӘҚБтК-нің 425-бабымен  (Халықтың санитариялық-эпидемиологиялық саламаттылығы саласындағы заңнама талаптарын, сондай-ақ гигиеналық нормативтердi бұзу) шара қолдану үшін Шымкент қаласының санитарлық-эпидемиологиялық бақылау департаментіне жолданды.
Осы орайда, Шымкент қаласы Полиция департаментінің қызметкерлері қала тұрғындары мен қонақтарын карантин режимін қатаң сақтауға шақырады. Заң талаптарын сақтамау құқық бұзушылық екенін ескертеді.