Президент Қасым-Жомарт Тоқаев өткен жылы қазақ классигі, ұлы даналарымыздың бірі Абай Құнанбаевтың 175 жылдық мерейтойын тойлағанда 10-шы тамыз күнін Абай күні деп белгілеп, бұл күнді мемлекеттік Жастар саясатымен ұштастырып жас ұрпақты ұлттық рухқа, отаншылдыққа тәрбиелеуге шақырған болатын. Сөйтіп, өткен жылы Абай күні тұңғыш рет бүкіл елде ерекше рухта аталып өткен еді.
Биыл да Абай күнінде Шымкентте Абай Құнанбаевтың ескерткішіне гүл шоқтары қойылды. Ұлы ақынның 176-жылдық мерейтойына байланысты ұйымдастырылған марафонға қалалық мәдениет басқармасының қызметкерлері, абайтанушы, зиялы қауым өкілдері және мектеп оқушылары қатысты.
Шарада Абай әндері мен қара сөздері орындалып, өлеңдері оқылды. Ұйымдастырушылардың сөзінше бұл іс-шаралар карантин талаптарын сақтай отыра кешке дейін жалғасын тапты.
Ханзада Есенова, Шымкент қалалық мәдениет, тілдерді дамыту және архивтер басқармасының басшысы: «Бүгін таңертеңнен бастап, Абай атындағы саябақта, Абайдың ескерткішінің алдында біз өзіміздің марафонымызды бастадық. Бұл гүл шоқ қою рәсімін таңертең бастап кешке дейін жан-жақты көрермендеріміз, тұрғындарымыз, зиялы қауым, жас ақындар келіп өзінің ризашылығын білдіріп кетеді».
Осылайша биыл Шымкентте атаулы датаға орай ұйымдастырылған шаралар екі күнге жалғасып ұлы тұлға арқылы ұлттық рухты көтеріп, жастарды отансүйгіштікке тәрбиелеуде маңызды орын алды.