Түркістан өңірінің астықты алқаптардың бірі саналатын Сарыағаш ауданында бидай ору науқаны қарқынды жалғасуда. Осынау науқанға білек сыбана кіріскен аудан диқандары жайдары жаздың әр сәтін қалт жібермей, астық ору қарқынын үдете түскен.
Дәл қазіргі таңда, егістік алқаптарында тізілген комбайндар алтын астықты ысырап қылмай, жиналған дәнді қамбаға құю үстінде.
Аудан диқандары жылдағыдай биыл да астық ору науқанынан үлкен үміт күтеді. Ағымдағы жылы Дарбаза ауылдық округі аумағындағы 15700 гектар жерге астық дақылдары себілген.
Оның ішінде:
— бидай-13700 гектар;
-арпа-2000 гектар.
Бұл аталған жерлер ауылдық округте орналасқан 45 шаруа қожалықтарына және 7 жауапкершілігі шектеулі серіктестіктеріне тиесілі. Биыл ауарайының қолайлы болуына орай өнімділік гектарына 20-25 центнерден алынуда. Қазіргі таңда астық ору науқаны 80 пайызға орындалып отыр.
Жалпы Дарбаза ауылдық округі бойынша жер көлемі – 77600,53 га, ауыл шаруашылық мақсатындағы жерлер – 69508,77 га. Оның ішінде: егістік жер – 21077,23 га, жайылым жер – 48431,54 га, елді мекен жерлері – 1420,96 га, елді мекеннің жайылым жерлері – 3975,59 га.