Қазақстан Республикасы Оқу-ағарту министрлігінің ұйымдастыруымен Түркістан облысының білім мекемелеріне министрлікпен қатар білім саласында сапаны қамтамасыз ету комитетінен жасақталған жұмыс тобы зерделеу жұмыстарын жүргізіп, оңтүстік өңірдің білім беру ұйымдарымен етене танысты. Түркістан облысы білім басқармасының басшысы Ғалымжан Сұлтанбекұлы Джумашев зерделеу тобының мүшелерімен кездесу барысында бірлесе атқарған жұмыстардың нәтижелі болатындығына, саланы дамыту барысына ерекше серпін беретіндігіне сенім білдіріп, істеріне сәттілік тіледі.
Қараша айының 13-24 жұлдыздары аралығында қаламыздағы 34 білім беру мекемелерінде болған жұмыс тобы іс құжаттарының жүргізілуі, оқу-тәрбие жұмыстарының белгіленген стандарттарға сай іске асырылуы, балалардың қауіпсіздігін қамтамасыз ету және қосымша білім беруді дамыту сияқты бірнеше саланы қамтып, зерделеумен қатар әдістемелік көмектерін ұсынды. Білім саласында сапаны қамтамасыз ету комитетінің департамент басшысы Аман Бақтыбайұлы Сейтов, сарапшы Қалкен Елеукенұлы Жахин, Қарағанды облысы Білім саласында сапаны қамтамасыз ету департаментінің басшысы Шынар Қуанышқызы Акпарова, Астана қаласы, А.Құнанбайұлы атындағы №87 мектеп-гимназиясының менеджері Райхан Шадырқызы Келбетова және Қ.Сәтбаев атындағы №7 мектеп-лицейінің директоры Күлпаш Байзадинқызы Мукашевалар мектеп әкімшіліктерінің жұмыстарына талдау жасап, педагогтардың жұмыстарына оң бағасын берді. Өз кезегінде танысқан жұмыстары бойынша әдістемелік көмектерін ұсынды. Зерделеу барысында Түркістан қаласы білім бөлімінің басшысы Оразкүл Шайхықызы Қолдасова жұмыс тобымен бірге болып, қаладағы мектептермен, ондағы атқарылып жатқан жұмыстармен таныстырып отырды.
Бүгін мектеп басшыларымен өткен басқосуда зерделеу жұмыстарының қорытындысы баяндалып, педагогтармен еркін пікір алмасты. Облысымызға келген жұмысшы тобының жетекшісі, Білім саласында сапаны қамтамасыз ету комитеті төрағасының орынбасары Гүлназ Төрәліқызы Сүлейменова сөз алып, жүргізілген жұмыстардың мақсаттары, нормативтік-құқықтық актілердің орындалуы бойынша кеңінен баяндап, іс құжаттарын жүргізуде мұқият болуға шақырды. Өз кезегінде Шынар Қуанышқызы мен Аман Бақтыбайұлы Түркістан қаласында жүргізілген зерделеудің қорытындысымен таныстырып, кемшін тұстарды болдырмау туралы нұсқамалар берді. Ал, басқосуға жиналған мектеп директорлары мен олардың оқу ісі жөніндегі орынбасарлары зерделеу барысында өздеріне мол әдістемелік көмек алғандықтарын, бұл көмектер өз жұмыстарына зор пайдасын тигізетіндіктерін айтып, бірауыздан алғыстарын жеткізді. Сонымен қатар, алдағы уақытта да үнемі байланыста болып, бірлесе жұмыс атқаруға дайын екендіктерін атап өтті.