Шымкент қаласы Сайрам тұрғын алабында орналасқан Наурыз саябағында Қазақстан халқы Ассамблеясының 30 жылдығына орай «30 қайырымды іс» акциясы аясында ауқымды қайырымдылық іс-шарасы өтті. Іс-шараны Шымкент қалалық «Қоғамдық келісім» КММ мен қалалық өзбек этномәдени бірлестігі бірлесе ұйымдастырды.
Шараның негізгі мақсаты – инклюзивті балаларға, сондай-ақ аз қамтылған және көп балалы отбасылардан шыққан бүлдіршіндерге көтеріңкі көңіл күй сыйлау. Осыған орай дастархан жайылып, балалар үшін қызықты ойындар ұйымдастырылып, әрі сыйлықтар табысталды.
Іс-шараға Шымкент қалалық ішкі саясат және жастар істері жөніндегі басқармасының бөлім басшысы, қалалық ҚХА хатшылығының меңгерушісі Айгүл Әмзеева, Қаратау ауданының әкімі Рақымберді Мүлкеманов, «AMANAT» партиясы Қаратау аудандық филиалының төрағасы Бауыржан Кеңесұлы, филиалдың атқарушы хатшысы Есімхан Бертаев, сондай-ақ ҚХА жанындағы өзбек этномәдени бірлестігінің төрағасы Тахирбек Нишанбаев қатысып, іс-шараның маңыздылығын атап өте отырып, жиналған көпшілікті қайырымдылық жасауға шақырды.
Айта кетейік, бұл акция аясында түрлі әлеуметтік маңызы бар игі істер жүзеге асырылды. Бұл шара тек мейірімділік пен қамқорлықтың белгісі ғана емес, сондай-ақ қоғамдағы ынтымақ пен бірліктің жарқын көрінісі.
«Шымкент келбеті»
