ҰЛТТЫҚ РЕПРОДУКТИВТІ ДЕНСАУЛЫҚ АПТАЛЫҒЫ: ЖАСТАР ҮШІН МАҢЫЗДЫ БАСТАМА

13–19 мамыр аралығында Қазақстанда дәстүрлі Ұлттық репродуктивті денсаулық апталығы өтеді. Бұл апталық – қоғамдағы маңызды мәселелердің бірі – жас ұрпақтың денсаулығын сақтау мен нығайтуға бағытталған іргелі бастама.
Жыл сайын өтетін бұл апталық денсаулық сақтау саласындағы мамандардың ғана емес, ұстаздардың, ата-аналардың және еріктілердің белсенді қатысуымен жүзеге асады. Шараның негізгі мақсаты – жастар мен жасөспірімдердің репродуктивті денсаулығы жөніндегі білім деңгейін арттыру, салауатты өмір салтын қалыптастыру және ерте жүктіліктің, жыныстық жолмен берілетін аурулардың алдын алу.
Денсаулық сақтау министрлігінің мәліметінше, елімізде жыл сайын бұл апталық аясында жүздеген іс-шара өткізіліп, мыңдаған жасөспірім мамандардан тегін кеңес алып, білімдерін толықтырады. Апта бойы ел көлемінде ашық есік күндері ұйымдастырылып, дәрігер-гинекологтар, андрологтар, дерматовенерологтар мен психологтар кеңес береді. Оқушылар мен студенттер үшін интерактивті кездесулер, тренингтер, пікірталас клубтары, театрландырылған көріністер мен флешмобтар өткізіледі.
Биылғы апталықтың ерекшелігі – оның онлайн және офлайн форматта қатар ұйымдастырылуы. Қалалар мен ауылдық жерлерде интернет арқылы қолжетімді дәрістер мен тікелей эфирдегі мамандармен сұхбаттар өтіп жатыр. Бұл, әсіресе шалғай өңірлердегі жастар үшін тиімді мүмкіндік.
Ұлттық апталықтың тағы бір өзекті қыры – ата-аналармен жұмыс. Көптеген мектептерде ата-аналар жиналыстары мен кездесулерде балалардың репродуктивті денсаулығына қатысты түсіндіру жұмыстары жүргізілуде. «Дені сау отбасы – дені сау ұлт» қағидасын ұстана отырып, ұйымдастырушылар бұл бағыттағы түсіндіру жұмыстарын қоғамда жалғастыру қажеттігін алға тартады.
Қоғамдық денсаулық сақтау саласының сарапшылары мұндай апталықтардың тұрақты түрде өтуі – жас ұрпақтың денсаулығын сақтаудағы стратегиялық қадам екенін айтады. Себебі, ерте алдын алу – кейінгі күрделі проблемалардың алдын алады.
Толығырақ: https://www.youtube.com/live/J14_AOHQQJI?si=RPNbLNfalg14GoKu
#РСКШЫМКЕНТ #БРИФИНГ