Сауран ауданына қарасты Оранғай ауылдық округі, Бостандық ауылында жастар мен жасөспірімдер арасындағы құқық бұзушылықтың, зиянды әдеттердің және этносаралық келіспеушіліктердің алдын алу мақсатында түнгі рейдтік іс-шара ұйымдастырылды.
Бұл шараның негізгі мақсаты – жасөспірімдердің қауіпсіздігін қамтамасыз ету, олардың түнгі уақытта ата-анасының бақылауынсыз көшеде жүруіне жол бермеу, сондай-ақ ауыл тұрғындары арасында бейбітшілік пен өзара сыйластықты сақтау.
Рейдке ішкі саясат бөлімінің басшысы М.Қалеке, ішкі саясат бөлімінің сектор меңгерушісі Қ.Тасыбаев, полиция қызметкерлері, «Қоғамдық келісім» КММ аудандық филиалының маманы Н.Оспанов және «М.Қазыбеков» атындағы жалпы білім беретін мектебінің директоры Н.Альтаев бірлесіп қатысты. Мамандар ауыл аумағын аралап, тұрғындармен, жастармен және кәсіпкерлермен кездесіп, заң талаптары мен қоғамдық тәртіп туралы түсіндіру жұмыстарын жүргізді.
Сағат 20:00–22:00 аралығында дүкендер мен қоғамдық орын иелеріне кәмелетке толмаған жасөспірімдерді заңды өкілінсіз кіргізбеу, сондай-ақ темекі мен алкоголь өнімдерін сатуға қатаң тыйым салынатыны ескертілді. Бұл – балаларды зиянды әдеттерден қорғаудың маңызды қадамы.
22:00-ден кейін ауыл аумағында түнгі уақытта ата-анасының немесе заңды өкілінің еріп жүруінсіз жүрген жасөспірімдер анықталып, олармен және ата-аналарымен түсіндіру жұмыстары жүргізілді. Мұндай шаралар баланың қауіпсіздігі мен болашағына деген жауапкершілікті арттыруға бағытталған.
Бұл рейд тек бақылау емес, ең алдымен алдын алу шарасы болып табылады. Ол жастарды құқық бұзушылықтан сақтау, олардың дұрыс жолмен өсуіне жағдай жасау және ауылдағы қоғамдық келісім мен тұрақтылықты нығайтуға бағытталған.
Сауран ауданы әкімдігінің ішкі саясат бөлімі
