Түркістан облысында аграрлық саланы дамыту, мақта өсірудің тиімділігін арттыру және озық ғылыми жетістіктерді өндіріске енгізу мақсатында республикалық «Дала күні–2026» ғылыми-практикалық семинары өтті. Қазақстан Республикасы Ауыл шаруашылығы министрлігіне қарасты «Қазақ мақта шаруашылығы ғылыми-зерттеу институты» ұйымдастырған бұл ауқымды іс-шараға Түркия, Өзбекстан және қазақстандық жетекші ғалымдар, агроөнеркәсіп кешенінің өкілдері мен сала мамандары қатысып, мақта өсірудің заманауи және озық технологияларын ортаға салды.
Халықаралық деңгейде өткен маңызды семинарда Мұхтар Әуезов атындағы Оңтүстік Қазақстан зерттеу университетінің ғалымы, «Агроинженерия және технология» ғылыми-өндірістік орталығының жетекшісі, ҚР ҰАҒА академигі Б.Е. Қалымбетов арнайы баяндама жасап, өзінің инновациялық жобасын өңір жұртшылығы мен шетелдік әріптестеріне кеңінен таныстырды.
Академик Б.Е. Қалымбетов «Ғылым қоры» АҚ тарапынан ұйымдастырылған гранттық қаржыландыру конкурсында жеңіп алған стратегиялық маңызы бар бастамасын көпшілік назарына ұсынды: • Жоба атауы: DP25997719 «Қолданыстағы мақта шитін түксіздендіру цехын технологиялық жаңғырту негізінде жоғары сапалы тұқым өндірудің серпінді технологиясын енгізу және мақта тұқымын өндірісін ұйымдастыру».
Бұл ғылыми жобаның отандық аграрлық сектор мен мақта кластері үшін берері өте мол. Аталған жаңа технология отандық мақта сорттарынан тұрақты әрі жоғары өнім алуға, сондай-ақ сапалы тұқым өндіру үдерісын заманауи халықаралық талаптарға сай түбегейлі жаңғыртуға жол ашады. Тұқымның өңделу сапасын арттыру арқылы өнімділікті ұлғайту, өндірістік шығындарды азайту және жергілікті шаруашылықтарды отандық жоғары сортты сапалы шикізатпен қамтамасыз ету сияқты өзекті мәселелер өз шешімін таппақ. Бұл өз кезегінде сыртқы импортқа тәуелділікті төмендетуге де оң септігін тигізеді.
Өңірде білім мен ғылымды, сонымен қатар ғылыми-зерттеу институттары мен нақты өндіріс орындарын тығыз байланыстырған Auezov University ғалымдарының бұл жетістігі — оңтүстік өңірінің ғана емес, бүкіл республикамыздың агроөнеркәсіптік әлеуетін арттыруға қосылған сүбелі үлес болып табылады. Университет базасында әзірленген осындай инновациялық жобалар өңірлік ғылымды коммерцияландырудың және өндірісті сапалы жаңа деңгейге көтерудің айқын дәлелі. Ғалымдардың енгізген жаңалығы ауыл шаруашылығы саласының бәсекеге қабілеттілігін арттырады.
