Жаңа бизнес-идеяларды іске асыруға арналған қайтарымсыз грант қарапайым азаматтарға, әлеуметтік осал топтағы жандарға көптеген мүмкіндіктер тудырып жатқаны анық. Бұл жоба аясында соңғы жылдары Қазығұрт ауданында жаңа бизнесін бастағандардың саны жыл санап артып келеді. Дегенмен, қайтарымсыз грантқа қол жеткізіп, мемлекет тарапынан берілген қаржыны мақсатсыз жұмсап жүрген жандар да жоқ емес. Осындай жағдайларды болдырмау мақсатында, 2023 жылы грант иегерлері атанып қайтарымсыз 1 млн 380 мың теңге мемлекеттен көмек алған кәсіпкерлердің жұмысын көру үшін Қазығұрт ауданының әкімі Азизхан Исмаилов арнайы іссапармен Қызылқия ауыл округіне барды.
Жұмыс сапары барысында грант иегері, ІІІ топ мүгедек санатындағы жеке кәсіпкер Нұрлан Қосақбаевтың «Ерекше балаларды түзету» кабинетінде болып, жұмыс барысын бақылады. Қазіргі таңда, телефонның және әртүрлі факторлардың әсерінен тілі мен сезім жүйелері кеш дамып жатқан балаларға әртүрлі емдік көмек көрсетіп жүрген кәсіпкер бұл бағыттағы жұмысын әрі қарай дамытып, бірнеше адамды жұмысқа қабылдауды жоспарлап отырғанын айтты.
Келесі кезекте Атажұрт елді мекенінің тұрғыны, ІІ топ мүгедек санатындағы жеке кәсіпкер Пулат Худайбердиевтің «Бал ара» шаруашылығына барып, бал өндіру жұмыстарын көрді. Атаулы кәсіпкер, қазіргі таңда 30 жәшік ара ұясын баптап, барлығынан таза бал өнімін өндірумен айналысып отырғанын, сонымен қатар болашақта ара санын көбейтуді, бал арасын сатуды қолға алу жоспарда бар екенін жеткізді.
Аудан әкімі Азизхан Азимханұлы кәсіп түбі – береке екенін айтып, екі кәсіпкердің жұмысына оң баға беріп, мемлекет тарапынан берілетін көмектерді көрсетуге дайын екенін айтты.
