Түлкібас ауданынан қаламы қарымды көптеген ақын-жазушы түлеп ұшқан. Солардың ішінде шоқтығы биік, өзіндік ізі бар ақындардың бірі – Алпыспай Боранбайұлы биыл 75 жас мерейтойын тойлап отыр.
Осы орайда, бүгін қазақ сатирасының сарбазы, ауданның құрметті азаматы Алпыспай Боранбайұлының мерейтойына орай аудан әкімдігінің ұйытқы болуымен «Алпыспабайдың алпыс әзілі» атты облыстық әзілкештер байқауы өтті.
Ісшараға аудан әкімі Асқар Естібаев, аудандық мәслихаттың төрағасы Серғали Сәрсенбаев, зиялы қауым өкілдері, аудан қонақтары мен тұрғындары қатысты.
Құттықтау сөзбен байқаудың шымылдығын ашқан аудан Түлкібастың киелі топырағында туып, ауылдан алыстамай-ақ, қаламын серік етіп, ауданның атын күллі Алаш жұртшылығына таныта білген жерлес ақынды мерейтойымен құттықтап, дәстүрге сай шапан жауып, қошемет білдірді. Сонымен қатар құттықтау дипломын табыс етіп, байқауға қатысқалы отырған өнер азаматтарына сәттілік тіледі.
Мәдени шара жалғасы байқауға ұласып, облысқа қарасты 11 аудан, қаладан келген театр майталмандары Алпыспай Боранбайұлының өнер туындыларын сахналап, өзара мықтыны анықтады.
Қазылар алқасының ұйғарымымен бас жүлдені Сайрам ауданының өнерпаздары қанжығаларына байлады. Жүлделі бірінші орынға Түлкібас ауданы, екінші орынға Келес ауданы, үшінші орынға Шардара ауданы мен Төлеби ауданының өнерпаздары ие болды.
Жиын соңында байқау жеңімпаздарына ақшалай сыйлықтар мен арнайы сертификаттар табыс етілді.
Түркістан облысы әкімінің баспасөз қызметі